Keychron K6 Review

_DSF2592.jpg

TL;DR

 CP值係有,新手入門可考慮,自組撚請回避。

眼見實在太多新手入嚟問keychron呢個問題,咁啱上個月有位師兄比咗隻K6 hotswap 紅軸我改,咁我就簡單評價下呢一隻鍵盤比大家參考下。本文尾都有我改咗嘅Typing Demo。

下文我係用一個初入門,錢唔多嘅角度作切入點。對有資源,玩開自組嘅朋友嚟講呢隻野本來就睇唔上眼。希望各位大佬體諒。

頭盔:我只係玩過K6,下面嘅內容都係基於呢一隻鍵盤,其它系列點樣我都唔知。
利申:我係無收過任何廣告費,完全個人感受。

外觀:6/10
原裝手感:5/10
功能性:8/10
改裝難度:3/10
總分:5/10


先講外觀,鍵帽個樣其實都真係幾唔錯,二色成型abs,個透光能力都唔錯。加上佢係用咗鋁邊框嘅設計,第一眼望埋去真係有premium嘅感覺。到我實際接觸佢嘅時候,發覺佢鍵帽摸上手,係真係幾滑下,而且比我覺得套鍵帽極容易打油嘅感覺(真係感覺嚟,實際上唔知易唔易)。

拆開個外殼,鋁邊框係用咗4條鋁片再「燙」入去佢底嘅膠殼組成。

望落其實真係唔錯,但係拆出嚟發覺條鋁都幾輕,個膠底殼比我有一種好廉價嘅感覺。

功能上以佢呢個定價提供咗藍牙,多系統切換其實都真係幾吸引。

另有提供熱駁插嘅版本,更加方便自組改裝同換軸嘅。

原裝打字手感對於有上開油嘅人嚟講真係好一般,不過意想唔到嘅係gateron紅軸都幾順。

香港嘅代理只係提供咗,Gateron 三大軸同埋光軸。有焊接同熱駁插版本。

個人覺得軸嘅選擇唔多,原本諗住佢用Gateron會有埋黃軸玩,去到問先知無黃軸,個人覺得有啲可惜。

衛星軸佢本身已經上咗油,

不過我覺得個量唔係太夠而且上得有啲求其。

加上plate mount衛星軸一直都有嘅wobble問題佢都有(個衛星軸會搖嚟搖去),大鍵嘅聲都係差咁啲,

呢個問題係Spacebar更加顯著。

對我黎講,呢一隻board如果只係stock既話我基本上係用唔落手。要上咗油同埋加左靜音墊我個人先認為係可接受範圍。

如果你係諗住就咁用stock既話你最好都係自己落場試下先。

我今次都係用Krytox 205g0 + LSD 上油,

再加咗日本城靜音墊入去。改裝後嘅提升真係好唔錯,打落真係幾好聽嘅。買咗或者諗住買嘅朋友可以睇下條片聽下。

最尾我係想講下隻board嘅造工。
今次我改嘅係熱駁插嘅版本,佢係pcb底痴咗唔少膠水,中間仲有條極幼嘅線。

另外佢多功能制入面比較幼,自己想改裝加靜音墊既時候要小心D。

總結黎講,個人認為呢一隻鍵盤對改裝有興趣,或者要求有藍牙嘅朋友係唔錯嘅。

但係如果你本身已經想用返D特別軸,稀有軸,或者對鍵盤打字手感有要求就未必岩你啦。

作為一個鍾意自組嘅玩家,我自己就唔會點樣考慮買佢。